മുംബൈയിൽ ഭീകരാക്രമണങ്ങൾ നടത്താൻ പദ്ധതിയിട്ടിട്ടുണ്ടെന്ന് ട്രാഫിക് പോലീസിന്റെ ഔദ്യോഗിക വാട്സ്ആപ്പ് നമ്പറിൽ ഭീഷണി സന്ദേശം ലഭിച്ചതിനെ തുടർന്ന് മുംബൈയിലുടനീളം സുരക്ഷ ശക്തമാക്കി.
നഗരത്തിലെ 34 വാഹനങ്ങളിൽ “മനുഷ്യ ബോംബുകൾ” സ്ഥാപിച്ചിട്ടുണ്ടെന്നായിരുന്നു സന്ദേശത്തിലെ പരാമർശം. സ്ഫോടനങ്ങൾ “മുബൈയെ മുഴുവൻ നടുക്കും” എന്ന മുന്നറിയിപ്പും നൽകിയിരുന്നു. ഗണേശോത്സവത്തിന്റെ പത്താം ദിവസമായ അനന്ത് ചതുർത്ഥിക്ക് പോലീസ് സുരക്ഷാ ക്രമീകരണങ്ങൾ ഒരുക്കുന്നതിനിടെ, വ്യാഴാഴ്ച ട്രാഫിക് പോലീസ് കൺട്രോൾ റൂമിലേക്ക് ഒരു ഭീഷണി സന്ദേശം ലഭിച്ചതായി ഉദ്യോഗസ്ഥർ വാർത്താ ഏജൻസിയായ പിടിഐയോട് പറഞ്ഞു.
ഭീഷണിയെക്കുറിച്ച് ക്രൈംബ്രാഞ്ച് അന്വേഷണം ആരംഭിച്ചിട്ടുണ്ടെന്നും തീവ്രവാദ വിരുദ്ധ സ്ക്വാഡിനെ (എടിഎസ്) മറ്റ് ഏജൻസികളെയും അറിയിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
‘ലഷ്കർ-ഇ-ജിഹാദി’ എന്നാണ് ഭീഷണിക്ക് പിന്നിലുള്ള സംഘടന സ്വയം വിശേഷിപ്പിച്ചത്, 14 പാകിസ്ഥാൻ ഭീകരർ ഇന്ത്യയിലേക്ക് കടന്നിട്ടുണ്ടെന്നും അവർ അവകാശപ്പെട്ടു. ആക്രമണങ്ങളിൽ 400 കിലോഗ്രാം ആർഡിഎക്സ് സ്ഫോടകവസ്തുക്കൾ ഉപയോഗിക്കുമെന്നും ഭീഷണിയിൽ പറഞ്ഞിരുന്നു.
പത്ത് ദിവസം നീണ്ടുനിൽക്കുന്ന ഗണേശോത്സവത്തിന്റെ ഗ്രാൻഡ് ഫിനാലെയ്ക്ക് ഈ ശനിയാഴ്ച മുംബൈ ഒരുങ്ങുമ്പോൾ, നഗരത്തിലെ തെരുവുകളിൽ ലക്ഷക്കണക്കിന് ഭക്തർ എത്തുമെന്ന് പ്രതീക്ഷിക്കുന്നതിനാൽ, പോലീസ് സുരക്ഷ ശക്തമാക്കി.
കിംവദന്തികളിൽ വീഴരുതെന്നും സംശയാസ്പദമായ എന്തെങ്കിലും പ്രവൃത്തി ശ്രദ്ധയിൽപ്പെട്ടാൽ ഉടൻ റിപ്പോർട്ട് ചെയ്യണമെന്നും സുരക്ഷിതവും സമാധാനപരവുമായ ആഘോഷത്തിന് എല്ലാ നടപടികളും സ്വീകരിച്ചിട്ടുണ്ടെന്ന് ഉറപ്പാക്കണമെന്നും പോലീസ് പൗരന്മാരോട് അഭ്യർത്ഥിച്ചു.
Courtesy: Times of India
