തിരുവനന്തപുരം ∙ പ്രവാസികൾക്കുള്ള നോർക്ക കെയർ പദ്ധതിയിൽ അംഗമാകാൻ നോർക്ക നൽകുന്ന തിരിച്ചറിയൽ കാർഡ് നിർബന്ധമാണ്. വിദേശത്ത് താമസിക്കുന്നതോ ജോലി ചെയ്യുന്നതോ ആയ പ്രവാസി മലയാളി ആയിരിക്കണം, കുറഞ്ഞത് 6 മാസത്തെ കാലാവധിയുള്ള പാസ്പോർട്ടും വിസയും ഉണ്ടായിരിക്കണം. മറ്റ് ഇന്ത്യൻ സംസ്ഥാനങ്ങളിൽ താമസിക്കുന്ന പ്രവാസി മലയാളികൾക്കും അപേക്ഷിക്കാം.
https://norkaroots.kerala.gov.in/ ലെ സർവീസസ് ടാബിൽ ക്ലിക്ക് ചെയ്യുമ്പോൾ, പ്രവാസി/നോർക്ക ഐഡിയിൽ രജിസ്റ്റർ ചെയ്യുന്നതിനുള്ള ലിങ്ക് ലഭിക്കും. ∙ തുറക്കുന്ന പേജിൽ നിർദ്ദേശങ്ങളുണ്ട്. അപേക്ഷിക്കാൻ ലിങ്കിൽ ക്ലിക്ക് ചെയ്യുമ്പോൾ, ലോഗിൻ വിവരങ്ങൾ ആവശ്യപ്പെടും. നേരത്തെ സൈൻ അപ്പ് ചെയ്തവർക്ക് അവരുടെ ഐഡിയും പാസ്വേഡും നൽകി ലോഗിൻ ചെയ്യാം. സൈൻ അപ്പ് ചെയ്യാത്തവർ സൈൻ അപ്പ് ചെയ്ത് ഇവ സൃഷ്ടിക്കണം. ∙ പാസ്പോർട്ടിന്റെ മുൻവശത്തെയും വിലാസ പേജിന്റെയും ഒരു പകർപ്പ്, വിസ പേജിന്റെ പകർപ്പ് / ഇഖാമ / വർക്ക് പെർമിറ്റ് / റെസിഡൻസ് പെർമിറ്റിന്റെ പകർപ്പ്, ഒരു ഫോട്ടോയും ഒപ്പും അപ്ലോഡ് ചെയ്യുന്നതിന് Jpeg ഫോർമാറ്റിൽ തയ്യാറാക്കണം. ഫീസ് 408 രൂപ.
