പന്തളം: ശബരിമലയിലെ ആചാരലംഘനത്തിനെതിരെ നാമജപ സമരം നടത്തിയ അയ്യപ്പ ഭക്തർക്കെതിരായ കേസുകൾ യു.ഡി.എഫ് അധികാരത്തിൽ വന്നാൽ പിൻവലിക്കുമെന്ന് പ്രതിപക്ഷ നേതാവ് വി.ഡി സതീശൻ. കോൺഗ്രസ് വിശ്വാസ സംരക്ഷണ യാത്രകൾക്ക് സമാപനം കുറിച്ച് പന്തളത്ത് നടന്ന മഹാസംഗമം ഉദ്ഘാടനം ചെയ്യുകയായിരുന്നു അദ്ദേഹം.
നൂറ് സീറ്റുമായി യു.ഡി.എഫ് അധികാരത്തിൽ വരുമെന്നതിൽ സംശയംവേണ്ട. അയ്യപ്പസന്നിധിയിൽ നിന്ന് കവർച്ച ചെയ്ത സാധനങ്ങൾ തിരിച്ചെത്തിക്കും വരെ യു.ഡി.എഫ് പോരാട്ടം തുടരും. അയ്യപ്പന്റെ സ്വർണം അപഹരിച്ചത് ആരാണെന്ന് പിണറായി വിജയനും കടകംപള്ളി സുരേന്ദ്രനും അറിയാം. ഏതു കോടീശ്വരന്റെ കൈയിലാണ് സ്വർണം ഉള്ളതെന്ന് കടകംപള്ളി പറയണം.
യോഗത്തിൽ കെപിസിസി പ്രസിഡൻ്റ് സണ്ണി ജോസഫ് അധ്യക്ഷനായി. യുഡിഎഫ് കൺവീനർ അടൂർ പ്രകാശ്, മുൻ പ്രതിപക്ഷ നേതാവ് രമേശ് ചെന്നിത്തല, കെ.മുരളീധരൻ, കൊടിക്കുന്നിൽ സുരേഷ്, ബെന്നി ബഹനാൻ, ഡിസിസി പ്രസിഡൻ്റ് പ്രൊഫ.സതീഷ് കൊച്ചുപറമ്പിൽ, ആൻ്റോ ആൻ്റണി, എൻ. പ്രേമചന്ദ്രൻ, ജെ.ബി.മാത്തർ, ഫ്രാൻസിസ് ജോർജ്, അറിവഴകൻ, എ.ഷംസുദീൻ, എ.പി.അനിൽകുമാർ, പി.സി. വിഷ്ണുനാഥ്, മാത്യു കുഴൽനാടൻ, ചാണ്ടി ഉമ്മൻ, പി.ജെ.ജോസഫ്, പന്തളം സുധാകരൻ, വി.എസ്. ശിവകുമാർ, എം.എം. ഹസൻ, അനുപ് ജേക്കബ്, ഷിബു ബേബി ജോൺ, സതീഷ് കൊച്ചുപറമ്പിൽ, സി.പി. ജോൺ, രമ്യ ഹരിദാസ്, ബിന്ദു കൃഷ്ണ, ഷാനിമോൾ ഉസ്മാൻ, പഴകുളം മധു, അജയ് തറയിൽ, ജോസഫ് എം.പുതുശ്ശേരി, എൻ.ഷൈലജ്, പി.മോഹൻ രാജ്, അബിൻ വർക്കി എന്നിവർ സംസാരിച്ചു.
